Skip to main content

எறும்புடன் ஒரு பயணம் - புனைவு

இன்று காலையில் தான் அந்த விநோதம் நிகழ்ந்தது. வழக்கம் போல் தாமதமாக அலுவலகத்துக்கு புறப்பட்டேன். உலகமே அழிந்தாலும் தன் கடமை தவறக்கூடாது எனக் கருதும் என் மனைவி எனக்குக் கட்டுச்சாப்பாட்டை தந்து விட்டு பெப்போவை (என் பையங்க) பால்வாடிக்கு அழைத்துச் சென்றார். நான் சாப்பாட்டை எடுத்துக் கொண்டு வழக்கம் போல் 24ம் எண் பேருந்தைப் பிடித்தேன். அதுவும் வழக்கம் போல் ஊர்ந்தே நகர்ந்தது.

நான் இருக்கும் லொராங் சுவானிலிருந்து பாயா லேபா தொடர் வண்டி நிலையம் செல்ல அரை மணி நேரம் ஆகும். அங்கிருந்து 8 நிமிட தொடர் வண்டிப் பயணம் தானா மேரா நிலையத்திற்கு. அந்த சந்திப்பில் பொதுவாக 10 நிமிடக் காத்திருப்புக்குப் பின் வரும் சாங்கி செல்லும் தொடர் வண்டியைப் பிடித்தால் அலுவலகம் அடையலாம். இதுக்குள்ள ஒரு மணி நேரமாகி விடும்.

இன்னும் பேருந்தில் தான் இருந்தேன். நிமிடக் கணக்கு, நொடிக்கணக்கு எல்லாம் பார்த்தும் 10 மணிக்கு முன் அலுவலகம் அடைய முடியாது என்ற உண்மை வெறுப்பேத்தியது. ஒலி பண்பலையில் ஆனந்தம் ப்ரூவுடன் ஓடிகொண்டிருந்தது. இன்னும் பத்து நிமிடங்களில் இந்திப் பாட்டு போட்டு விடுவார்கள். நினைக்கும் போதே இன்னமும் வெறுப்பாக இருந்ததது.

அப்போது தான் அந்த எறும்பைக் கவனித்தேன். என் சாப்பாட்டுப் பையின் மேல் ஒரு கடி எறும்பு (சிவப்பா இருக்குமே அது தான்) ஊர்ந்து கொண்டிருந்தது. இது எப்படி இங்கே? பேருந்து நிறுத்தத்தில் காத்திருந்த போது தொத்திக் கொண்டிருக்க வேண்டும். இப்படியே பேருந்தில் விட்டால் யார் காலிலாவது பட்டு நசுங்கி விடும். பையின் விளிம்புக்கு வரும் போதெல்லாம், அதைப் பிடித்து மீண்டும் நடுவில் விட்டு கண்காணித்துக் கொண்டிருந்தேன். இறங்க வேண்டிய நிறுத்ததில் ஏதாவது செடியின் மேல் விட்டு விடலாம் என்று முடிவு.

இரண்டு நிமிடங்கள் கூட என்னால் இப்படித் தொடர முடியலை. விரலில் ஏறிய எறும்பு விரலசைவில் தன் சமநிலை தவறி காற்றில் மெல்ல அசைந்து இருக்கைக்கும், பேருந்தின் உட்புறச்சுவருக்கும் இடையே தன் கைகளை பிடிமானத்துக்காக விசிறியவாறு விழுந்தது. அது கைகளை விசிறிய போது அப்படியே மெதுவாக உருமாறி என் பெப்போவைப் போல் தெரிந்தது. 'அய்யோ, என்ன செய்வேன்' என்று பதறி ஒரு நொடியில் கீழே விழுந்த பெப்போவைத் (அதாங்க, எறும்பு) தேடலானேன். பக்கத்தில் அமர்ந்திருந்த சீனப் பெண் 'என்னாச்சு, இவனுக்கு' என்பது போல் பார்த்தார். அசடு வழிந்த நான் இருக்கையில் அமர்ந்த படி கால்களை அகட்டிக் கொண்டும், பையை நகர்த்திக் கொண்டுமிருந்தேன். கடுப்பாகி, அந்தப்பெண் வேறு இருக்கைக்கு மாறிக் கொண்டார்.

எல்லோரும் என்னைப் பார்த்த போதும், இப்போது கொஞ்சம் வசதியாய் இருக்கவே நன்றாக குனிந்து தேடினேன். அகப்பட்டுக் கொண்டது. மகிழ்ச்சியுடன் கையில் எடுத்து உத்துப் பார்த்தேன். ஏதாவது அடி பட்டிருக்கப் போவுது. உற்றுக் கவனித்ததில் அது பெப்போ இல்லை என்பதை உறுதிப் படுத்திக் கொண்டேன். நிறுத்தம் வந்தவுடன் அந்த எறும்பை அங்கிருந்த மதில் சுவர் செடியில் விட்டு, விட்டு 'அப்பாடா'ன்னு சாலையைக் கடந்து தொடர் வண்டி நடை மேடைக்கு வந்தேன். எல்லாம் போன ஞாயிறு 'honey, I shrunk the kids' சன் தொலைக்காட்சியில் பார்த்ததால் வந்த உள்ளக் குளறல். எப்படியோ ஒரு எறும்பை காப்பாத்தி இருக்கேன். :-)

Comments

நல்லா கவனிச்சீங்களா முகவை! உங்க மனைவி கட்டுச்சோற்றைத் தந்தாங்களா? கட்டுச்சாப்பாட்டையா? அந்த சீனப்பெண் உங்களைத் திட்டாமலா போனாங்க? ஏதோ சிங்கைங்கிறதால தப்பிச்சீங்க. நம்ம ஊராயிருந்தா நடத்துனர் உங்களைப் பேருந்திலிருந்து கீழே இறக்கிவிட்டிருப்பாரு. உங்க நல்ல மனசுக்கென் பாராட்டுக்கள். அந்த எறும்பைக் காப்பாற்ற வேண்டும் என்று உங்களுக்காவது தோனிற்றே. நீங்க பேருந்தைவிட்டு இறங்கி அங்கிருந்த மதிலில் எறும்பை விடும்போது அது உங்கள்ட ஒண்ணு சொல்லிச்சே அதஏன் சொல்ல மறந்தீங்க. 'ஏன் இப்படி வேலைக்குத் தாமதமா போற? என்னமாரி சுறுசுறுப்பா இரு அப்டின்னு சொல்லுச்சா இல்லியா?'
:-))))

பாவம். அதை வேற பேட்டையில் கொண்டு விட்டீங்க? இனி எப்படித் தன் குடும்பத்தைக் கண்டு பிடிக்கும்?

அதோட மனைவி, அதோட பெப்பா எல்லாம் அப்பாவைத் தேடி அழமாட்டாங்களா?

இதுக்குத்தான் 'குடும்பப் பாட்டு' ஒன்னு வச்சுக்கணும்!
எறும்பைக் காப்பாற்றியாச்சு...பாராட்டுக்கள்...வயத்துக்குள்ள போன / போக இருக்கிற சிக்கன் ?
:)
@அமுதா
//உங்க மனைவி கட்டுச்சோற்றைத் தந்தாங்களா? கட்டுச்சாப்பாட்டையா?//

எலுமிச்சைசாதம், தயிர்சாதம், புளியோதரை, இவற்றைத் தானே கட்டுச்சோறுன்னு சொல்லுவோம்? சாம்பார்/புளிக்குழம்பு ஊத்தி பிசைஞ்சு தர்றத கட்டுச் சாப்பாடுன்னு தானே சொல்லணும்.

இது பாதி உண்மை, பாதி புனைவு. அதனால மத்த கருத்துக்களை அப்படியே விட்டுடறேன்.

@துளசி கோபால்,
புன்னகைக்கு நன்றி.
//பாவம். அதை வேற பேட்டையில் கொண்டு விட்டீங்க? இனி எப்படித் தன் குடும்பத்தைக் கண்டு பிடிக்கும்?

அதோட மனைவி, அதோட பெப்பா எல்லாம் அப்பாவைத் தேடி அழமாட்டாங்களா?//

ஆமால்ல, பாவம் அதோட குடும்பம்.

//இதுக்குத்தான் 'குடும்பப் பாட்டு' ஒன்னு வச்சுக்கணும்!//

சரி விடுங்க, இந்நேரம் குடும்பப் பாட்டைப் பாடி ஒண்ணு சேந்துருப்பாங்கன்னு நினைச்சுக்குவோம்.

@கோவி
//எறும்பைக் காப்பாற்றியாச்சு...பாராட்டுக்கள்...வயத்துக்குள்ள போன / போக இருக்கிற சிக்கன் ?//

ம்ஹூம், எவ்வளவு யோசிச்சு(!) சிங்கப்பூர் காலை வாழ்க்கைய ஒரு புனைவா குடுத்தா கேக்குற கேள்வியைப் பாருங்க!
Aruna said…
கோவி.கண்ணன் said...
எறும்பைக் காப்பாற்றியாச்சு...பாராட்டுக்கள்...வயத்துக்குள்ள போன / போக இருக்கிற சிக்கன் ?
:)
repeat!!!!!!!
anbudan aruna
கிரி said…
:-)))) :-))))

இந்த பின்னூட்டம் ஜெகதீசன் அவர்களுக்கும் சேர்த்து ;-)
திரும்பக் கேட்கும் அருணா மற்றம் புன்னகை பூத்த கிரி, மனதின் ஓசை வரவிற்கு நன்றி.

@அருணா, 50க்கு வாழ்த்துகள்.

@கிரி, 50 குறைவா பின்னூட்டம் வாங்கறது இல்ல போல;-) ஜேக் பேரைச் சொல்லி நீங்களும் புன்னகையோட கிளம்பிட்டீங்க. வாழ்க!
கிரி said…
//@கிரி, 50 குறைவா பின்னூட்டம் வாங்கறது இல்ல போல;-) //

இதெல்லாம் எப்போது வேண்டும் என்றாலும் 5 கூட வராமல் போகலாம்..நான் எழுதுவதை எப்போதும் போல் தொடர்கிறேன்.

//ஜேக் பேரைச் சொல்லி நீங்களும் புன்னகையோட கிளம்பிட்டீங்க.//

ஜெகதீசனை அவர்களை தான் இப்படி சொன்னீங்களா ..நான் குழம்பி விட்டேன்..உண்மையாகவே..:-))

உங்க பதிவுக்கு பதில் என்ன சொல்றதுன்னு தெரியல கோவி கண்ணன் பின்னூட்டம் பார்த்து.. அதனால் வேற வழி இல்லாமல் இப்படி செய்தேன்..
உங்களுக்கு எறும்பு ச்சீய்.. கரும்பு மனசு.

Popular posts from this blog

ஈ என இரத்தல்...

நண்பகல் உணவுக்குப் பின் பூட்டியிருந்த ஒரு கடையின் அருகே மரநிழலில் வண்டியை நிறுத்தி புகை பிடிக்கத் தொடங்கினேன். புறநகரின் உட்பக்கம் செல்லும் அந்தச் சாலையில் போக்குவரத்தே இல்லை. பெட்டிக் கடையின் பின்புறம் ஒருகுடிசை மாதிரி ஒண்டி வீடு இருந்த்து. வாசலில் பாவாடை சட்டை போட்ட ஒரு பெண் வெளிப்புற அடுப்பினருகில் ஏதோ வேலை செய்து கொண்டிருந்தாள். அவளை அங்கே பலமுறை பார்த்திருக்கிறேன். அப்பொழுது அவன் வந்தான். திடீரென்று 'இந்தக் கை உடைஞ்சி போச்சி' என்று அவன் பேசத் தொடங்கியதும் தான் அவன் இருப்பையே உணர்ந்தேன். பழசாகிப் போன அல்லது அழுக்குச் சேர்ந்த உடைகளை அணிந்திருந்தான். சில நாளாக குளிக்கவில்லை போல. பிச்சை கேட்பானோ? இதே பொழைப்புன்னு எரிச்சலாகவும் இருந்தது. குடித்துவிட்டு வந்திருந்தால்? ஒருவேளை பணம் கேட்பானோ? அதெல்லாம் இல்லைன்னு சொல்லலாம்னா அவன் இன்னும் எதுவும் என்னிடம் கேட்கவில்லை. ஒருவேளை பணம் கேட்டு, தரலைன்னா கையப் புடிச்சுக் கேட்டா? ஒரே அப்பு! ச்சீய், என்ன ஒரு மனநிலை. ஒருவிதமான கூச்சமும் எரிச்சலும் கலந்த அச்சம் தான் என்னிடம் இருந்தது.

அந்தப் பெண்ணைப் பார்த்தேன். எங்களை எந்தவித உணர்ச்சியும் …

யார் வள்ளல்?

கடையெழு வள்ளல்கள் பற்றி கேட்டபொழுது, அந்த சிறு வயதில் வியப்பே மேலிட்டு நின்றது.
இல்லையென சொல்ல மாட்டார்களாமே; ஈயேன் என்பது இழிவு என வாழ்ந்தார்களாமே எனப் பல முறை வியந்து போனதுண்டு.

அதியமான் நெல்லிக்கனி ஈந்த போது ஔவையை விட நான் அதிக உவகையுற்றேன்.

அத்தனையும் பாரியையும், பேகனையும் அறிந்தவுடன் பொசுக்குனு மறைஞ்சு போச்சு. (உபயம்; பாதி ஆசிரியர், மீதி என் பற்றா அறிவு).

மேகம் கண்டு, மோகம் கொண்டு மயில் ஆடினால்,
பேகன் பட்டுப் போர்வை தந்தது அறிவு மட்டு.

தன் நிலை கொள்ளா முல்லை; கண்டதும்
பாரியின் தேர் அவனிடம் இல்லை.

இப்படி சிந்திக்காமல் ஈதல் எப்படி வள்ளல் தன்மை ஆகும்? சே, சுத்த பைத்தியகாரத்தனம்னு நினைச்சேன்.

அண்மைக் காலமாக வரும் எட்டாவது வள்ளல், ஒன்பதாவது வள்ளல் அறிவிப்புகள் மீண்டும் பழைய ஞாபகங்களை தூண்டியது.

இவர்கள் நிச்சயம் பணக்காரர்கள். ஆனால், மனசாட்சி இவர்களை வள்ளல்கள் என ஏற்க மறுத்தது. ஆயிரம் பேருக்கு என எண்ணி அன்னதானம் செய்பவர், ஆதாயம் எண்ணி செய்பவர் எப்படி வள்ளலாக முடியும்?

ஆம்!

எண்ணி, எண்ணி செய்பவன் பணக்காரன்;
எண்ணிய உடன் செய்பவன் வள்ளல்.

பாரியும், பேகனும், அதியமானும் எண்ணிய உடன் வழங்கினார்கள். எதிர்காலம்…

விசயம்

தனித் தமிழில் பேசிப் பழக வேண்டும் என்று முடிவுக்கு வந்த போது பிற மொழிச்சொற்களை இனங்காண முற்பட்டேன். சில சொற்களை எளிதாக மாற்ற முடிந்தது. உபயோகம், பிரயோசனம் போன்றவற்றை பயன்பாடு கொண்டு நீக்கிட்டேன். சில சொற்கள் எளிதாக அடையாளம் கண்டாலும் பயன்பாட்டில் கொண்டு வருவது அரிதாக இருந்தது. வார்த்தை அதில் ஒன்று.

இன்னும் சில சொற்களைப் பல இடங்களில் பயன்படுத்த தடங்கலாக இருந்தது. இந்த சொற்றொடரில் (வாக்கியமில்லை) தடங்கல்/தடை என்பதற்குப் மாற்றாக சிரமத்தைத் தான் பயன்படுத்திக் கொண்டு வருகிறோம். தடையைக் கொண்டு வருவது அரிதாக இருகிறது. அரிது என்ற சொல் கச்டத்தை நீக்கும். ஆனால் தடையைப் பொருட்படுத்தாது பயன்படுத்துவது அரிதான செயலாகத் தான் இருக்கிறது.

மிகுந்த தடங்கலை ஏற்படுத்திய சொல் விசயம். இதற்கு ஈடான சொல் தமிழில் எனக்குத் தெரியவில்லை. பாவாணரைப் பார்த்தால் பற்றியம் என்கிறார். அதாவது ஒன்றைப் பற்றிய செய்தி/தகவல் என்பதால். மற்றபடி, இடத்துக்கேற்றவாறு பல சொற்களை ஈடாகப் பயன் படுத்த முடிந்தது.

புழக்கத்தில்: என்ன விசயமா வந்தீங்க?
மாற்று: என்ன வேலையா வந்தீங்க?

புழக்கத்தில்: சொல்ல வந்த விசயத்தை சட்டுன்னு சொல்லுங்க.
மாற்று: சொல்…